Search
  • Jamil Doaihi

الشاعر د. جميل الدويهي: الشاعر إذا بيموت (إلى روح الشاعر الصديق روميو عويس)

وين الخطيّه لو بقي شاعر حزين لابِس قميص رْقيق متل الياسمين؟ وين الخطيّه لو غِفي نتفه الزَّمان وما كان يزعل من رجال الملْهَمين؟ لو كان هالصفصاف عالي وما انحَنى وعالنهر عَصْفور العَتابا وميجنا والوقت لولا ما انكسر... كان القمر كاسة دهب ونبيد من كَرْم اللِّنا...

يا حاملين النعْش، هالشاعر حلو لو كان حَدّي... كنت فيّي إسْألو: من وين جاب الحبْر تا يضْوي السطُور وبيوت هنّي قصور ما بيتْقفّلو؟ يا ريت فيّي رّجّع الوقت لوَرا تا ودّعو... وأعرف حقيقَه شو جرى... معقول ما يغنّي لنا مقطع أخير؟ ويْصير كلّ الشِّعر قوضَه مْسكّره. زرار القصيده يَبّسو هيْدي السِّنه لا ورْد جُوري فتّح، ولا سَوسنِه ومعَنْوني أوّل قصيده بالكتاب: الشاعر إذا بيموت... بتموت الدني... كاس النبيد... وإنت قطّرت النبيد من قبل ما سافرت عالشطّ البعيد وجولييت بعدا ناطره تا تبوسْها وتلمَع عا خصْلة شعْرها بيوت القصيد... يا روميو سلّم عا أهْلي الطيّبين مكتوب مش عم يبعَتولي من سْنين... في ناس قبل الموت ماتو من زمان وفي ناس بعد الموت فينا عايشين.

_____


مشروع أفكار اغترابية للأدب الراقي - سيدني 2021