Search
  • Jamil Doaihi

الشاعر عصام ملكي: صاحب قلم جرّار (إلى الأديب د. جميل الدويهي)















يا جميـل الفيك مـا عاش الغــرور

معروف شعرَك من مناهل صافيه

لمّا "القصيده" ضاعت بقلب البحور

طيرك عا ريشو جاب وزن وقافيـه.

طيرك رياشو صافيـه بلون السمـا

وبلحْمتــو دمعـة عناقيـد الكــروم

صاحب قلـم جرّار إنت بتتسمــى

لازم قيامة شعرنا بشعـرك تقـوم.

يا طالع بهالجـوّ بالشعـر الحلــو

تخمين إنت خلقت للكلمه رسول

في ناس طلعو بس بدهم ينزلــو

وإنت طلعت تا تقول: ممنوع النزول.

عندك فكر خلاّق ومْجالك بعيد

ما بتنحصر بالسهل وبشقفة جبَل

وتنّور ضيعه، وبسترينة يوم عيد

وحْيك بكومــة لا نهايه منجبَــل.

إنت الجميل ومرجع الصبر الجميل

بإخلاصك جروح الصداقه بتنقطَب

الشاعر اذا بالشعر جاب المستحيل

وضيّع شعورو من الحياة بينشطَب.

الشاعر عدوّ المال من فجر الدني

خْيال الطمع من ديرة الفيها هجَر

هلّي بيوت الشعر عندو بتنبني

عا أْصولها ما عمّر بيوت الحجر.

إنت متل عملاق عن حقّ وحقيق

بتقدر تجيب الفعل من اسم العلَم

ضلّ على ذات الخطّ وبذات الطريق

يا شاعر العا الصدق عوّدت القلم.

11 views0 comments