Search
  • Jamil Doaihi

كلادس القزي: خلصت الحكايه




لا كلمه 

لا ابتسامه 

ولا غمزه

قلت لحالي:

يمكن خلصت الحكايه...

وصرلو  زمان القمر غايب

وما شفتو عالمرايه...

وعا جسر الأمان ما طلّ

ولمّا تلاقو عيونو بعيوني 

ما تتطلّع فيي 

ولا حكي كلمه زغيره

قلت: الهيئة مقهور

ومن الجنيّه مسحور 

وزعلان من الأميره

اللي ناطره كمشه حنان

اللي قالت:

حتى بأحلام النوم

ما بقى في آمان.


يا جسر الغابه العتيقه

شو كنت تخبّي أسرارنا

وتسأل : قديش مرقو عشّاق عالقنطره

أخدو معهن أخبارنا...

وقديش حكيو حكايات عنّا 

وإنت ضليّت تسمع

ولا مرّه زعلت

ولا مرّه حسدت نور القمر... 

كنت تفرح كل ما تلاقو تنين عاشقين

سكرو بالحنين...

وهلّق لمّا عالجسر 

ما بقي إلّا قصص حزينه 

وطيور خايفين...

غاب حبيبي عنّي

ووقعت تحت الريح

خيمة ياسمين.

25 views