Search
  • Jamil Doaihi

كلادس القزي: ذكرى من حبيبي



حسدوني الناس لأنّي مغرومه...

مش عارفين إنّو حبيبي

عايش ورا الغيم...

وما طلع عا بالو يزورني

ولا نقعد سوا

مع زنبق الغابه...

من هيك صار الزنبق

يبكي عا القناطر...

والناطر

رح يبقى طول العمر ناطر...


صرلو مدّه بيُوعدني

إنّو رح يرجع بالعيد...

مرق العيد

ومرق شتي تشرين...

وتلج كوانين...

والربيع ما طلّ...

وهيك اصفرّ بالغابه القمر الحزين...

ولمّا خبّيتو بكتابي

كتبت تحت صورتو أحلى الكلام...

وَحْدو هالقمر

رح يبقى ذكرى من حبيبي...

ورح ضلّ إكتبلو إنّي بحبّو

تا يخلص الورق

وتضجر منّي الكتيبه.

39 views