Search
  • Jamil Doaihi

كلادس القزي: مين قلّك؟




مين قلّك إنّو بطّلت فكّر فيك؟  مين قلّك إنّو بطّلت حبّك؟ هيك الليل وشوشني بالعتمه السهرانه وكان عم يحكي الحقيقه وأنا صدّقتو  لأنّو ما رفّ جفونو  لمّا خبّرني... وقلت: يا دلّي  إذا حبيبي نسي الأميره وبطّل مغروم بعيوني العسليّه. وتذكّرت  لمّا القمر كان يسهر عا شباكي كان الندي يسأل شو بني! كان حامل بإيدو ورده مخمليّه  وتا يراضيني كان يحكي السما تا تزلغط الأشعار... وعا باب الدار  كان يقلّو للنور تا يرسم الألوان...  ما تزعل حبيبي بهالزمان مرّه الدني بتكون غريبه ومرّه بيتكون هنيّه ويمكن بدها شي عجيبه  تا تنقلب الإيّام ويتدخّل سحر الأحلام تا يصالحنا سوا... وهيك يمكن يسألني أمير الليالي:  إذا صحيح أنا إشتقتلو وإذا صحيح زعلت عا غيابو؟ شو بيلبقلو حبيبي يتغنّج  ويكون متل الشمس الحارقه بيغيب لمّا تغيب  وبيرجع إلي بكرا

هوّي وعطرو الغريب.    

18 views