Search
  • Jamil Doaihi

كلود ناصيف حرب: لازم إشتري كتاب المعاني

من كم يوم
حبيبي بيحكي كتير
عن الحرير
بيقلي:

الحرير الغالي...

حقو عشر ليالي

وبيقلي كمان:

شو حلو عليكي هالحرير

والخيّاط خيّط إلك وحدك...

وقلك: تغنجي عا مهلك...

غير الحرير ما بيلبقلك...

وقلي حبيبي:

يخلّيلي صباحك

وحرير ضحكتك...

ومره وشوشني:

يسلملي الحرير الغالي

والورد العالي...

وبسهره قال:

كل شي حلو

لعيونك الحلوين

وحرير من أغلى ما يكون...

شو بحبّ هالحرير

اللي حقو مليون...

***

بيحكي حبيبي عني

وأنا ما عرفت

إنو الحرير مش تيابي...

وإنو الورد هوّي شفاف عطشانين

لكلمة حنين...

وإنو الصبح نظره من عيوني

ورنين الساقيه صوتي...

لازم إشتري كتاب المعاني

تا أعرف حبيبي شو عم بيقول

وخلف الكلمه

قديش في كلمات

ورنين نغمات؟

هيك بحبّو هالحلو

اللي ما بشبهو حدا...

وبيسرقني من حالي عالهدا...

هيك أنا بحبُّو.


0 views0 comments