Search
  • Jamil Doaihi

مريم رعيدي الدويهي: بسّ يطلع الضوّ


(من مجموعة جديدة تصدر من مشروع "أفكار اغترابيّة" في أوائل عام 2022) [عالعين يا امّ الزلف عينِي يا موليّا لحَبيبي خاتم دهب وبلوزَه ورديَّه...] لا تزعل يا قمر الصيف... يا حكاية النهر الزغير لو راحو الغجَر... وما تركو غير الموقده وحيطان عريانه عم ترجف بهوا تشرين... قولك سافروا عا أيّا بلاد؟... أخدو معهن قناديل السهر... والخيل سودا متل الحبر عا كتاب... متل لون الغياب. أنا وإنت وحدنا عالشطّ ناطرين... وما بقي معنا دهب تا نعطي الريح... انسرقو منّا ضحكاتنا وهمس الليالي وسياج النسرين... وهلّق الشارع حزين... وكلّ الناس من أوّل الأرض لآخر الأرض تنين زعلانين. لوين رح نمشي؟... وتهدر العاصفة ويغرق السهل بالشتي... وليش تا نفتح شبّاك الذكريات... ونتذكّر شو انقال وشو ما انقال؟ كلّ الحكي رغوه... وإنت الأمير الغالي عا برج القصر العالي إلك قمح البيادر ومنجيرة الموّال وإلك رمح الخيّال... بسّ يطلع الضوّ بيخْلصو حْكايات وبيتكسّرو مْرايات... واللي مرقو عا بوابنا... وانكتبو قصّه بكتابنا ما كانو غير... خْيالات.

3 views0 comments