Search
  • Jamil Doaihi

مريم رعيدي الدويهي: بشكيلك



بشْكي منّك

وبشْكيلك

وما بعرف شو بدّي إحكيلك...

يا ليل طويل

يا مستحيل...

ببكي منّك

وبغنّيلك.


يا وجع العمر التعبان

بهْرب من شغل بالي

وبروح لعندك

تاري إنت شغل البال...

يا تاركني عا مفرق غياب...

أنا والليل والضباب.


هيك فرّقتنا المسافات

وعا محطّه غريبه

شفت ناس كتار

ناس معهن حكايات

وناس معهن شنَط أسرار

وولاد زغار

بيفكّرو التْران لعبه

كان قبل شوي بالعلبه

وطلع تا ياخدهن مشوار.


فكّرتك راجع

تا تسألني عن إيّامنا الحلوه

وأنا ناطره عا بابي

وعم يوسَعو تيابي

تاري السكت عم ياخد المطارح

بين اليوم ومبارح...

وعم فتّش عا حالي

قولك أنا هون

أو سرقوني الخيّاله؟


هيك الزمن عم يبرم فينا

وعم يمحي أسامينا

وهيك الريح بتاخدنا

وبتشلحنا أنا وإنت

عا بحر

ما إلو مِينا.



2 views