Search
  • Jamil Doaihi

مريم رعيدي الدويهي: بعيد المشوار



أنا وإنت... وجنينتنا

والذكريات الغاليه

عالمقعد الأخضر

سوا نغزل من خيوط الشمس

خيمتنا...

ومع ابتسامه صباحيّه

نشرب القهوه

طعمتها متل الحياة

وأسرار بكعب الفنجان مخبّايه

ما بيعرفها حدا

إلاّ البصّاره

جارتنا الختياره...

مبارح شافت فنجاني

والقهوه مدينه وناس وبيوت هربانين

قالتلي: الطرقات كتير طويله

وبعيد المشوار

وبعد إشارات عنّا فرح جايي

والفرح متخبّا ورا البردايه...

لكن بعدو القماش عند الخيّاط

وما درز لهلّق الحكايه...

ونحنا عالشوق ناطرين

تا ترجع لنا اللحظات

وترجع لنا الضحكه

اللي انمحيت من زمان

متل سطور محيها الشتي

من كتاب القرايه.


6 views