Search
  • Jamil Doaihi

مريم رعيدي الدويهي: بقيت وحدها الغيمه



شفت ناس كتار

وساحر بساحة المدينه

وولاد مجتمعين

من ألعابو متعجّبين...

وهوّي لمَطارح بعيده بياخدنا

وبيجيبنا...

وبيترك الدهشه بعيون الزغار

اللي ناطرين تخلص اللعبه

وتخلص الكذبه...

كيف بتتغيّر إشيا كتيره

وبتخلق حكايه؟

داخ السؤال

والوقت متل الشجر ساكت

وعريان متل الريح

وغيمه بيضا كانت بالجوّ

طيّارة ورق

وفي حدا معو الخيط والبكره

ومعو مبارح وبكرا...

ضحك الساحر من كتر ما صدّقنا

وحمل غراضو وراح...

وهيك تفرّقنا...

وبقيت وحدها الغيمه

فوق شبابيك منسيّه...

قولَك مين علّقها

وصارت بالجوّ شمسيّه؟


3 views