Search
  • Jamil Doaihi

مريم رعيدي الدويهي: غابة ضياع



رحت عالغابه

قبل ما ينطفي سراج النهار

تا إفتح خزنة ذكرياتي

من بعد ما خبّيتها

تحت شجرة عاليه

بعرفها من بين كلّ الشجر

عا غصونها عندو بيت القمر

وطيور الصيف

عملو فيها مهرجان

رقص وموسيقى بيانو

ومعزوفة كمان...


ما لقيت الشجرة اللي حبّيتها

وأسراري فيها خبّيتها...

وزعلت كتير

لأنّو القصص ضاعو منّي

وخفت حدا يعرف الأسرار عنّي...

معقول هالشجره صارت حطب للشتي؟

أو طارت بالريح لبعيد

ونسيت المواعيد؟

مرق الوقت

وتسكّروا بواب الليل

وضلّيت وحدي مع ظنوني

تا صار الدمع بحيره بعيوني...


قصّة عمر

وقعت من إيدي

وصارت بالنسيان...

وما بقي معي غير الخيبه

وسؤال كبير

أكبر من الأرض والسما

عا وراق الزمان.



3 views