Search
  • Jamil Doaihi

مريم رعيدي الدويهي: فراشه


رحتْ عا جنينتي بكّير

وكان الصبح شي إنّو واعي

تا إشرب القهوه...

وكان زهر اللوز

تياب للمقعد...

وفراشه طايره

عم تتمرجح عالنسمه

فوق الورد الأحمر...

فكّرتها عم تتسرّق عليّي

تا تعرف شي خبريّه

وقلت لحالي:

ليش ما بعزمها

تا تقعد حدّي

وتْسلّم عليّي؟


الفراشه غطّت عا فنجاني

وما خافت منّي

ومتل اللي بدها تحكيلي

عن مشاوير بعيده...

طرقات

ومسافات

وولاد عم يلعبو تحت الشجر

عن فلاّحين ما بيرجعو عالبيت

إلاّ بعد ما يطلع القمر...


مرق الوقت

وخلص الكلام

والفراشه متل الجهلانه

صارت تطير

وتعمل مشاوير

بين زهر اللوز

وبين البنفسج اللي مفتّح

عا فستاني.



1 view0 comments