Search
  • Jamil Doaihi

مريم رعيدي الدويهي: يا هالسنونو

Updated: Sep 11



يا هالسنونو

اللي صرلك من سنين

بتروح وبتجي

حدّ شباك الياسمين...

الهوا مرجوحه

وإنت بتتمرح متل ولاد الزغار...

قولك شو معك أخبار

من بلاد بعيده

ما بتوصل لعندها مراكب بحّار

ولا بَريد الأسرار؟...

عا غفله تركتْنا

وطالت غيبتنا...

قولك هاك الأرض

رح ترجع لعنّا

ونقعد بفيّة شجر أخضر

بالغابه العتيقه؟...

قولك الحلم بيصير حقيقه؟

أو كتب الأحلام هنّي كذبه؟...

هونيك عنّا بيوت

غمرها السكت والنسيان

وكرمنا دبلان

مشلوح بالفيّ والأحزان...

خدنا معك يا هالطير

تا نطير متلك بالوديان

ونغطّ عا تلال

من حرير مشغوله

وساحات بيعرفو أسامينا

من إيّام الطفوله.

10 views