Search
  • Jamil Doaihi

قصيدة الشاعر حنا الشالوحي في رثاء صديقه طوني حبقوق


الصاحب بيحْزن عا خسارة صاحِبو اللي معوَّد يزورو ويكون بجانِبو

وقدَّيش رح نشتقلَك ونسأل عليك يا رْفيق غالي الموت عنّا غيَّبو

ويا أبو جان الكان قلبي يهفّ لَيْك وزورَك وكاسي بمحْضَرَك إستطيِبو

ويِشعَل فرَح قلبي بضحكِة عينتَيك وبْرجعْتي وْداعك كنت إستصعِبو

ولمّا بضريحَك شفتك مكتَّف يَديك وما قدرت ظنّي بهيك مشهد كذّبو

سألت القدر: كيف الحكم قرّرتْ هيك؟ ولمّا عرفتْ عا عمر بو جان انختَم

ما عاد ينفعنا العتب تا نعاتِبو.

يا بيّ عيلِه فخرْها بْإيمانها يعني بألله وبأرز لبنانها

ربّيتْها متل العا مرباك اعتَنو وكانت وفيِّه والصدق عنوانها

وثروة محبِّة إمَّك وبيَّك جَنو عا الأرض كانت راجحه بميزانها

وفيها اعتنو وجنِّة الخالق زيَّنو ومن أجمل ورود السما بألوانْها

ولمّا بحِمى الله بْأمان استوطنو وصارو لمريم من نُخب أعوانها

مْطارح لإخوانَك وإختك أمّنو وسكْنو بحماها وقدّرو إحسانها

ولمّا عا جمع الشمل كلُّو أعلنو وشجرة العيله يكتمل بنيانها

بعد التشاور والحوار تمكّنو ونقلوك يا بو جان عا سابع سما

وكنت آخر غصن من أغصانها.

ويا أمّ جان القلبِك معتَّم كئيب وتِقل الجبال الهمّ طالعلِك نصيب

تعوكَر صفا عيشِك وقلبك علِّتو بغيبة عميد البيت مش ممكن تطيب

لكن نظر الله عليكي ورحمتو وحنّيّتو أنفع من عْلاج الطبيب

بترجِّع لجوِّك سلامو وراحتو كلما تناولتي جسد إبنو الحبيب

وولادِك الحفظو وصايا كنيستو ويسوع من قلبِك ومن قلبُن قريب

حدِّك رح يكونو عا طول بغيبتو ومع جان من دون شكّ رح يتعاونو

وما يتركوكي وحْدِك بْحمل الصليب.

بناتِك بعزِّيهن وإصهرتِك كمان وكلّ حبقوقي، وكلّ عيال بان

وإخوتَك برجع بعزِّي عيالها وبْقلّها: يبقى فِدى عنكن بو جان

ويا جان هالعيله صرت رجّالْها غمِرْها متل بيَّك بعطفَك والحنان

وإمّك عليك معلّقَه آمالها وباب بيت الأهل ضلّ مشرّعو

بترْبَح رِضا بيّك وبتعيشو بْأمان.

#كتاب

1 view