Search
  • Jamil Doaihi

جميل الدويهي: بغير الحلم ما بتطلّ صوبي (إلى والدي الحبيب)


يـــــا بيِّي ليش مـــــا قبلتْ الهديّه؟

ولا بدّك عــــا حــَـــدا تردّ التحيّه؟

رحتْ تـــــا زُورك بأرض البعيده

وتا إحْكي عالهَدا شو صــــار فِيّي

وتا قلّك شو كتبتْ عنّك قصـــــيده

أنـــــــا المشتاق للخلقه الرضيّه...

لقيتَك شارد، ومــــــا مْسكت إيدي

وعا إيدي اصفرّت الورده الصبيّه

يا بَيّي قــُــــــول شي جُـمـلِه مفيده

مـَـــا بدّي تصـير شمعَه منطفيّه...

ومــــــــا بدّي قامة السيف المديده

يْطول سْكوتْها، ومـــا تْعود لِيّي...

بعد مـــا غبتْ، ما عيّدتْ عيدي...

وصرتْ مَجهول، مـا بحْمُل هويّه

رحتْ بكّير تـــــــا إجمع حصيدي

طلِعلي الشوك، وكْيـاس الخَطيّه...

ورحتْ تــــــا إلبس تيابي الجديده

لقيتا مــــــــــــن عَذابي مهتريّه...

وقعتْ عالأرض، وتكسّر نشيــدي

مــن الأحْزان... متل المزهريِّه...

ارجعلي وقُــــــول: يا إبني سَعيدِه

تـــــا غنّيلك مطالِــــــــــع مخمليّه

احكيلي قصّة بلادي الــــــــوحيده

وأرز عـــــــا سطَيحة الغيم النقيّه

وشُمــــوخ جبالنا الخضرا العنيده

العَليها تحطّمت ريـــــــــح القويِّه

يــــــا بيّي، دَوّبو دْموعي الحَديده

وبِغَير الحلم مـــــــا بتطلّ صَوبي

وأنـــــــــا مفتوح بابي منْ عَشيّه.

#كتاب

1 view0 comments