Search
  • Jamil Doaihi

من الشاعر جوزيف عقيقي إلى الزميل العزيز د. جميل الدويهي المحترم


مش دارس التدجيل والنصب الظريف

حتّى عن المسموع ما بعْطي دليل

بحبّ النعومه بحضرة الجنس اللطيف

وبـِعشق ثقافة شاعر القمِّه الجميل.

ما بْقدِّر الإنسان عا لْسانو الطويل

بقدِّر مزايا العلْم بالشخص الذكي

واللي بيعرف موقعو، شاعر أصيل

يْخلّي البقيِّه عند تجّار الحَكي.

طيور الذكيِّه بتعرف حبوب السبَل

وبْيعرف الحصّاد شو شمَّل غْمار

وبيعرفو العشّاق طعمات القُبَل

وبيعرف النحّات صوّان الحجار.

الشاعر إله زغير عا أرض الوجود

بْيحكي حلا، بيكتُب صلا لمجد العُلى

وهالشاعر البلمعرفِه اجتاز الحدود

بْيبقى بأعلى مرتبِه بعصر الغَلا.

الله عطاك وكنت للعاطي وَفي

وحلوِه الجواهر يلْبسوها صْحابها

شو قيمة المليان قلبو عاطفِه

خزانِه ملانه مسكّرين بوابها؟

شفت القلم مقهور من حظّو القليل

بالشغل ليل نهار راحه ما إلو

فزعان يسأل حضرة الشاعر جميل:

لولا أنا دشّرتكن، شو بتعملو؟

الدكتور جاوب بعد تفكيرو العميق:

روحو اتركولي هالقناعه بمسلَكي

لكن أنا رح قولها لشاعر رقيق:

صَفّى قليل عليك تاج المملكِه

انْ حكمو دقيقه عليك بالصمت العميق

بتطلع قصيدة شعر من صمت الحَكي.

#كتاب

Copy of 15 Nov 2021.jpg