Search
  • Jamil Doaihi

الشاعر لطيف مخايل: نجدّد للمعنّى ألفباؤو


قصيدة الشاعر لطيف مخايل في حفلة جوقة المسرح الوداعية بحضور نقيب شعراء الزجل في لبنان الشاعر جورج أبو انطون ورئيسة جمعية إنماء الشعر العربي المحامية بهية أبو حمد وحضور

كلما القلب بيحنّ لبلادي بتخايل الأرزات بتنادي: ليش صاير قلبكم صوّان؟ تمنيت حدّي إقشع ولادي بحلم يقولو شعبنا فرحان وصارت ليالي الكيف منعادي وما يضلّ ببلادي شخص عطشان والجايع بيحصل عا زّوادي انتخبو رئيس وعدّلو الميزان تا الجيش يقوى موقفو زيادي وبالسلاسل ربطو الشيطان وحطوّ أفاعي الشر عا حْيادي... نوّار ودّعنا وشهر نيسان حزيران حسنو للنظر بادي ولمّا الصيف يطل علبنان بيبعت ورودو الياس وسعادي. *** ويا الياس يا سعاده سوا شدّو معكن نقيب الشعر مين قدّو؟ معكن الأسَّس منبر بدادون ودّف الفغالي حامل بيدّو معكن الرجّع للمعاني عيون وصوبو عيون العالم إنشدّو معكن الفجّر بالقوافي عيون وحدّ النجوم العالية حدّو معكن الباني للقصيده حصون عواميدها ممنوع ينهدّو معكن العندو من الزجل مخزون لو طاف ربعو... الكون بيهدّو لولا بِغنّي شعر ببحمدون الناس من عكاّر بيردّو مفروض فينا نعدّ بو انطوان بيّ الفكر والشعر والكلمة وبيّ الوفا والمكرمة نْعدّو. *** وتحت حمل الشعر في كتار ناؤو وزادو بالتواؤو وانحناؤو ونحنا بتضحية وهمّة قويه رجعنا نجلسو من إلتواؤو رجعنا عن محبّه وطيب نيّه نجدد للمعنّى ألفْباؤو لأنّو بكلمة الشعر الطليّه بدنا بنزيد عا نعمة سناؤو زجل لبنان نغمتنا الشجيّه من الضيعة جذورو وإنتماؤو وصّا أسعد الخوري وصيّه وأبو روكز ما منخيّب رجاؤو ونقيب الشعر معنا بهالعشيّه السموأل عم بيشحد وفاؤو بجهدو ردّ للشعرا الهويّه وحدّو البحر نقطه بإحتواؤو وسعاده سعادة نفوس الأبيّه والدكتور منقدّر عَناؤو وبهيّه صاحبة طلّة بهيّه بدار القنصليّه سجّلتنا وردّت للزجل روعة بهاؤو.

#كتاب