Search
  • Jamil Doaihi

الشاعر الدكتور جميل الدويهي: من وقت ما عيونِك


الهيئه الحَكي ما عاد يتْفسّر

والترجمان كتير مــتـْــأخّــــــر

فتحتْ الكتُب، برْكي التقيتْ ببيت

يشرح لِكي قدّيشْني مْعتّر

وأعذار فيها بتقْبَلي ما لْقيت

وتا تسامْحي ما قدرتْ إتصوَّر...

يا ريت فيكي تفْهَمي... يا ريت

شاعِر وقـَع بالريح، وتْكسّر...

بْوشوِش لِكي بالليل عالسِّكّيت

كيف انجرحتْ برمْشك الأسْمر

وكيف القصايد ما عْرفتْ غنّيت

وكيف الحْروف صْلبتْ عالدفتر؟

مجهول عنواني، وما عندي بيت

وإسمي الحقيقي صعْب إتذكّر

وتا تفتحي لي الباب شُو تمنّيت...

معقول يبقى هَيك متسكَّر؟!

لعندك بَريدي كلّما ودّيت

بيقول: "صَعبه كتير تتغيّر"...

منْ وقت ما عيونِك أنا حَبّيتْ

فيّي الزعَل عم يرْكض لقدّام

وكلما كبِرتْ بالعُمر، عم يكْبَر.

#كتاب

0 views