Search
  • Jamil Doaihi

الشاعر د. جميل الدويهي: بوسِه... ما أكتَر


مْبارحْ مَرَق عا حَيّنا مَرْقه

والوعْد منّي بْياخْدو سِرْقَه

بَوسِه ما أكتَرْ، بسّ متل جْنون

معقول إنّو الحُبّ هَيك يكون

ونرْجُف أنا وهوّي متل وَرْقَه؟

لمّا تركْني وراح... شو تْمنّيتْ

إمشي مَعو، وما يْردّني عالبيت...

يا ريت مِشوار الهوى كفّيتْ

وما رْجـِعت للأحْزان، والفِرقَه.

صُورهْ إلو ما شِلْت من بالي

وما قـْدرتْ إمْحي العطْر عن شالي

معقول يحْكو الناس عن حالي

وتِعْمل حَريق شْفاف مِحْتِرقَه...

إمّي كأنّو عِرفتْ الأسرار

قالت: ما بدّي تْألّفي أخْبار...

خْدودِك ما كانو قبل ساعَه كبْار...

ولا كان لَوْنا حُمْرتِك... زَرقا.

_______________________________________

من مجموعة "من قلب جُرْحي بْقول حبّيتِك" (مجموعة شعريّة باللهجة العاميّة تصدر في 30 آذار 2017 من ضمن مشروع "أفكار اغترابية" للأدب المهجريّ الراقي من أستراليا).

جميع الحقوق محفوظة للشاعر د. جميل الدويهي ومشروع "أفكار اغترابية" للأدب المهجريّ الراقي.

#كتاب

16 views