Search
  • Jamil Doaihi

قصيدة من الشاعر أحمد الحسيني إلى جميل الدويهي


قصيدة للشاعر السيد أحمد الحسيني مهداة الى صديقه الشاعر د. جميل الدويهي

يا جميل القلب بعدو مطرحو

مهما العوازل جرّبو ما بيفلحو

بعدنا عالعهد في عناّ ضمير

وعهد الوفا للشاعرية منمنحو

أنت الملك عن جد ّيا شاعر كبير

تاج القوافي لابسو وما بتشلحو،

أنت سيف الموهبي، مُلهَم، بَصير

غربَل قصيد الجاهليه، ونقحَّو

يا لابس الالهام سترة من حرير

الوزن المكسر بالقوافي صلّحو

جايب من الارزات نفحات وعبير

حامل لواء الشاعرية... تطرحو

يا حامل الانجيل وبنَصو خبير

وراضي بقدس المريميه تسبحّو

من مقلع الشعّار غرّد يا أمير

وخلي رجال العبقرية يفرحو

ريشه قلم للحبّ ما إلها نظير

توشّح بنات الفكر حتى يسرحو

بعلم وجمال وفلسفه عالم قدير

أهل القصيدي والمعنىّ صرّحو

ونَّوار مثلك بالحلا مش راح يصير

حقّك جمال البدر تقعد مطرحو

جناح النسر بالجوّ ما بدو خفير

ما دام قرص الشمس فيك تصبّحو

يا غصن أخضر فوق، عا مَية غدير

ورد المعطّر للصبايا بتشْلحو

يا رائد الأحرار، عنّك مش كتير

لو قلت إنّو المجْد عندك مسْرحو

وفوق المجرّة متلك بيقدر يطير

وبين السما والأرض نجم يصافحو.

#كتاب

4 views