Search
  • Jamil Doaihi

الشاعر طوني رزق: الصدى المنحوت


الصدى المنحوت

إلى روح أمير الزجل الشاعر يعقوب عبيد

دقّيت عاباب الصدى المنحوت

بإيد القصيده لواقفي عالباب

لقيت العمر خلف المدى مزتوت

.ودمعة حبر رح تكسر المزراب

وهونيك شفت الوقت عم بيموت

وبكرا لبكرا ما نْعملُّو حساب

وجرح الحكي مخبّى بورقة توت

.وتشرين مش تارك عا شجره تياب

وبعدا عا حيط الذاكره لبيوت

تعلّق قصايد من وجع سرساب

ووحدو الوجع بيموتو لسكوت

ووحدو القلم بيسرسب الكلمه

.ووحدو الحبر بيسرسبو الكتاب

لمّا غبت يا مير غاب كبير

وضاعت الكلمي بدمعة غيابك

وتنعُود نتذكّر شو قال المير

.نفتش عليها بغبرة تيابك

يا ريت جينا عالدِّني بكّير

وفشخا وطنّا يكون عن بابك

كنّا زرعنا ارزنا نواطير

.تحرس الارزه وتحرس ترابك

بسّ العمر يا مير متل الزير

لواقع ببير الوهم عا حسابك

من هيك علينا السما تا تصير

.تغيب الشمس بقطبة جيابك

وطير الفينيق لكان كل ما يطير

ما يلتقي الاّ على عتابك

بعرس التلاقي ما وقع بالبير

كتبو كتابك عا صدر لغياب

.تا يقتدو الشعار بكتابك

#كتاب

2 views0 comments