Search
  • Jamil Doaihi

الشاعرد. جميل الدويهي: نحنا شجر ما بيكْبرو


حُبّي لكي أوْهام من نسْج الخيال

بيناتنا غابة صَدى، وعتـْم الجْبال

يمْكن لأنّي طفل عالمَقْعد غِفي

حلْمي وقـَع عالأرض، وانبحّ السؤال

عا قـَدّ حَبّة رمْل عندك عاطِفي

ومتلِك مرا ما شفتْ بتْحبّ الدلال

سنْتين مَرقو، والقمَر رح ينْطفي

ومن كتر ما حْكينا هرِبْ منّا الحَكي

وكل البِقِي حَرفين عا حَيْط الزَّوال.

كْسرتْ الوَحي بالمطرَقه متل الرخام

ما عاد بدّي إقشَع دْمُوع الحَمام

عم يسْألوني الناس عن شِعري الحزين...

شو بقول غير... تْقطّبو شْفاف القْلام؟

والمحبَره الفيها عبير الياسَمين

سكّرْتها، وتْركتْها بشارع ظـَلام

وخْزانتي اللي كلّها دفاتر حنين

خِلّعْتها... وما عدتْ زرْتا بيوم عِيد

وكلْما عَليها مْرقتْ... ما بـِرْمي السَّلام.

بمعْبد سُكوتي قْدرتْ إعمل مُعجِزات

لكنْ ما فيّي ردّ مَيّت للحياة

نحنا شجَر ما بيكْبَرو تحت الضباب

والريح عم بتْصيح عالاربع جهات

نحنا سفينِه معطّله ببَحر الغْياب

ويا ريت فيها بعد مَرْكب للنجاة...

كلمة حَبيبي الكانت بقلب الكْتاب

امْحيها متل ما مْحيتها... وليش الزعل؟

أحلى قصص عشّاق... صارت ذكريات.

الحقوق محفوظة - أفكار اغترابية للأدب المهجري الراقي

Project Diaspora

2017

#كتاب