Search
  • Jamil Doaihi

الشاعر د. جميل الدويهي: صورتِك


من صورتِك عينين صابُوني تـْنعْشر دوا بالكاد شِفْيوني وكلما قلت: رح نام طول الليل... بتحْكي معي... وبتقلّقي عيوني.

برْوازها مَنّو دهب أصفر... هيدا حنين الروح عم يكبَر وقـْزازها لولا انكسَر شي يوم قلبي معو بيصير يتْكسّر...

وبْلوزة اللي ازرارها انْفكّو عن جَوز محْتالِين، ما اتـْحَكّو كْمشتُن قبل ما يهْشَلو بالبرد جابُو الدرَك عالبيت، وتْشكّو.

وشْفاف أطيب من عنب تشرين سْلامات ما بعْتو إلي من سْنين هِنّي معي، وإنتي ما بعْرف وَين وفي ناس قالو: مْسافره تخْمين...

لْجاره غَريبه عْطيت فنْجاني قالت: إشارة يَوم والتاني رح تِمْرقي... وهلّق أنا عالدرب تحْت الشتي عم ألّف غْناني...

بحبِّك إلِكْ أكتر من الصُّوره ووقت الما فِيّي زورِك... بْزورا عندي لكي صُوره بْورق عالحَيط وصُوره بْقلب مشتاق مَحفُوره.

#كتاب

Copy of 15 Nov 2021.jpg