Search
  • Jamil Doaihi

الشاعر د. جميل الدويهي: كوني هيك... حزّوره


يا ساحرَه، شو بتعملي فيّي؟

صفّيت وحْدي بأرض برّيّه...

سَيفين شغل الهنْد... جَرْحوني

وفي ناس قالو: كتير مجْنونه

لكنْ أنا عم قـُول: عاديّه...

بتضيّعيني بقلب خبريّه،

يا ملعّبِه... متل الحراميّه...

وكلما قلت: معليش تا نحكي

بتجاوبيني بفرقعة ضحكه...

وبْتاخْدي صابيع إيديّي...

شي يوم قولي: منلتقي بُكره...

ولو كان صَعبه تنجح الفكره

نقّيت جوز حروف حتّى قول

ومن شان ما يهرب شهر أيلول

خيْط الزمَن لفّيتْ عالبَكره...

بالسوق لمّا بعْت لامُوني

مالي انْسرق، والناس لامُوني

وكْتبتْ عا الورقَه: الهوى محْتال

راح وتركني عالدرب تمثال

وصار الوقت غزّال بِعْيوني.

معليش كوني هيك، حَزّوره

غابة سؤال بْضلّني زُورا

نصّ الحقيقه بحبّها أكتر

لو بعرف الأسرار بتغيّر

وما بْعود فيّي كمِّل الصُّوره...

يمْكن غريب تفكّري إنّي

وتا ينْتهي المشوار تتْمنّي

من هيك ضاعت فكْرتي بالليل...

الفرسان حَدّي بيمرقو عالخَيل...

تحت الشتي، وْما بْيسْألو عنّي.

#كتاب

0 views