Search
  • Jamil Doaihi

الشاعر د. جميل الدويهي: لا تغيبي كتير


مش عم إفهم ليش بْحبّك

يمكن أنتي كذبه كبيره

يمكن وهم بيمْشي قبالي

حزّوره إنتي عن حالي

بأيّا سحْر دخلتي عا قلبي اللي مسكّر

مفتاحو الما عندي غيرو

نسيتو بالصحرا المهجوره

يمكن من سنتين وأكتر...

كيف نسيتو؟

وليش نسيتو؟

ما بتذكّر.

***

مش عم أعرف كيف خلقتتي

لا شفتِك مطرح

لا حْكِيتِك

لا شحدتْ البوسه من تمّك

يمكن قالت عني إمّك:

أوعا تبوسي هيدا الشبّ

اللي بيطْلَع عا طول خْواتو

وبيضَلّ مْضيّع عقْلاتو

يمكن قالولِك رح خونِك

يعني فيّي مرّه حبّ

عْيون اللي مش متل عْيونِك؟...

إنتي جنيّي

ولابقلِك هالفستان اللوْنو زهري

اعطيني منّو خيط زغيّرْ

عرْوه حتّى يفرح عمْري

وبتْقولي مين العذّبني؟

عذّبني الشال العنّابي

وشْفاف الطلْعو من الغابِه

تا موت وإفقع من قهري...

وبتقوليلي كتاب الشعر لمين كتبْتو؟

ومعقولي لهلّق ما عرفتي

إنّو الكحله الفوق رموشك

عم إسرق... تا إكتب شِعْري؟

***

إنتي الموجه اللي بتاخدْني

إنتي الشوق اللي بيُوعدني

إنتي الضحكِه الما بتنساني

والصوت الأحلى من غْناني

من قبل العصْر اليوناني

بفكّر فيكي... وبْحاكيكي

وتحت جناحاتي بْخبّيكي

ولولا إمّك بتوصّيكي

يمكن بوسِه ما تكفّيكي

قبل العِيد البوسه عم إعطيها بْلاش

ودزّينه فيّي إعْطيكي.

***

بشوفِك قبل الوقت وبعدْ

بشوفِك فوق دموع الوردْ

بوصّيكي لا تْغيبي كتير

غيابك سَيف اللي بيجرحْني

وبيتْركني بقلب العتمِه

ما بتمْرق عا بابي نسْمِه

بشْتقلِك والشوق بيكْبر

وبأحلامي بْطير لعنْدك

من شبّاكي...

من هيك بْصلّح القزاز

وبالليل بْيرْجَع يتكسّر.

#كتاب

8 views