Search
  • Jamil Doaihi

كلود ناصيف حرب: شو بخاف يجي الشتي


ما غفيتْ عيوني من سنين... من هاك اليوم اللي زيّنتْ فيه شعري

بزهرة ياسمين... من يومها لا نمت

ولا عرفت النوم

وأنا والسهر ع بوابك ناطرين قديش مرقو عالمفرق ناس وقدّيش قالو ناس بُكره راجعين لكن أنا وحدي إلك

ببقى معك عا طول

يا إنت وأنا...

ما في حدا متلك إنتْ بالعاشقين...

***

بتعرف شو؟ بعدو هاك الناطور سهران عا باب المدينه

عم يتسرّق علينا بالليل وخايفه شي مرّه تغفى عيونو

وتدبل هاك الورده...

ويجنّ جنونك وتقلّو:

مش أنا وصّيتك تنتبه عا وردة الحلوين؟ وانا من يومها لا شَعري مشّطتْ

ولا عا مراية السما تطلعتْ...

وبْعدّ الإيّام

تا تفرح الوردة بعرس الحنين...

***

... وشو بخاف يجي الشتي

وتمرق عاصفه

وتصفرّ وراق الشجر

وتاخدها الريح العنيده

وتهرب طيور الغابه عا مطارح بعيده

وما يضلّ غير السكت عا بابي...

وبخاف إنّك تهجر مملكتي

وينطفي قنديل السهر

وما تبقى نسمه عالشجر

وتترك إلي عتم وضجر

وأحزان بالقلب اللي حبّك كل هالسنين .. عا طول تبقى طلّ عليي...

وخبّرني عنّك خبريّه

ولو مرّة بالسنه

تا تضحك الدني...

***

طمّن بالك حبيبي

الورده الحبّيتها

بعدها سهراني ناطره نظره من عيونك الحلوين

ومش رح يمشي الزمان

ما زال إنتي وأنا تحت القمر

عاطول سهرانين.

#كتاب

0 views