Search
  • Jamil Doaihi

كلود ناصيف حرب: نغم عا شفافي


وبتسأل ليش بزعل؟

بزعل لما القمر بيغيب

وإنت مش حدي...

ودموعي عالمخدّه...

لما نجوم السما بيلمعو

وانت النجمة الوحيدة الغايبه عن عيوني

ليش تا قلك شو بني

وانت بتعرف شو بني ..

يللي عندي أغلى من الدني؟...

أوقات بسْهر لطلوع الضو

انا ونجوم السما

ومعهم بحكي حكايات

وبيودّي نسيم الليل وشوشات منسيه

وبتشتي الغيمه عالورده المخمليه...

قديش كتبنا عا شجر الحور

وغلّيتْ بتيابك

تا إهرب من الريح الجبليّه

وشو بخاف شي مرّه تروح

وتتركني أنا والليل

وصير شمعه مطفيّه...

وبعدك بتسألني ليش بزعل

وليش ما بتنام البنت الصبيّه؟

شوف كم مرّة طلع القمر

وأنت وين وانا وين؟

يا ساحر العينين

مبارح ما طلّيت من عشيّه

وكرمالك سرقت عطر الليل

من قلب المزهريه

وتمنيت إني شوفك

وما تغيب لحظة من عينيّي

وقلك: يا قمري

خبّيتك بقلبي

ورح تبقى بقلبي

وإنت وحدك نغم عا شفافي

وما بتخلص الغنيّه.

#كتاب

10 views