Search
  • Jamil Doaihi

الشاعر د. جميل الدويهي: ليش بحبّك؟


صعبه إفهم ليش بحبّك

يمكن أنتي كذبه كبيره

يمكن وهم بيمْشي قبالي

حزّوره إنتي عن حالي

بأيّا سحْر دخلتي عا قلبي اللي مسكّر

مفتاحو الما عندي غيرو

نسيتو بالغابه المهجوره من سنتين...

وكيف نسيتو؟

ما بتذكّر.

مش عم أعرف كيف خلقتتي

لا شفتِك مطرح

لا حْكينا

لا شحدت البوسه من تمّك

يمكن قالت عنّي إمّك

أوعا تْبوسي هيدا الشبّ

اللي بيطْلع عا طول خْواتو

الما عندو شغله ولا عمله

إلا يبرُم عا عقلاتو

يمكن قالولك رح خونك...

وحياتِك ما فيّي إعشق

غير عيون المتل عيونِك.

إنتي جنيّي

وهيدا الفستان اللونو زهري

اعطيني منّو خيط زغيّر

عِرْوه حتّى يفرح عمري

زافو هوّي اللي شرّدني بقلب الغابه

وعم إبكي وحدي عا غيابي...

وعم يضحك هوّي من قهري.

وبتقولي هالشعر لمين كتبتو؟

يعني ما شفتي ولا قشعتِي

ورحتي عالبير وعطشانه رجعتي...

يمْكن عم حاكي الطاحونه...

وهيّي سمعتني

وما سمعتي.

إنتي الموجه اللي بتاخدْني

إنتي الشوق اللي بيوعدني

إنتي ضحكه عا طُول بتعرف عنواني

والصوت الأحلى من غْناني

من قبل العصر اليوناني

بفكّر فيكي... وبْحاكيكي

وتحت جناحاتي بخبّيكي

ولولا إمّك بتوصّيكِي

يمكن بوسه ما تكفّيكي

قبل العيد البوسه عم إعطيها بلاش

ودزّينه فيّي إعطيكي.

بْشوفِك عم تمْشي عالورقه

عْيونك متل الغيمه الزرقا

وشفافك أحلى من الورده

كيف بعيده إنتي عنّي...

وما بلاقيكي إلاّ حدّي؟

مش عم أعرف ليش بحبّك

هلقدّ ورَح حبّك أكتر...

لو ما تكوني إنتي عيوني

كانو أفكاري نسيوني

وكانو أحزاني عا قدّ البحر

وأكبر...

إنتي خلقتيني من حالي...

وغيّرتي اللي ما بيتغيّر...

ولو مرّه قلتي: ما بحبّك

قلبي عالأرض بيتكسّر.

#كتاب

12 views