Search
  • Jamil Doaihi

الشاعر د. جميل الدويهي: هلقدّ بحبِّك


هْديّه لكي الشمس العا برج المملكِه ومهْر الأصيلْ... هديّه لكي روحي يا أحلى عيون بيودّو إلي مكاتيب مع طير الوِدا وكلمة حبيبي بتكتْبيها عالهدا... وكلّ الأنا قلتو لكي

عليكي قليل بلّشت فيكي كتاب عمري وبلْحقك تا يخلصو الإيّام عالدرب الطويل... هلقدّ بيحبّك جميل.

تحت الشتي تنيناتنا، كلماتنا، خيْباتنا... ودمعاتنا... لكن بعد رح تضحكي وإضحَك أنا وإعقد لكي من عطر زهر المريمي زنّار عالخصر النحيل... ويا ريت فيّي لو شمْع ضوّيت صابيعي لِكي ردّ الجْميل يا ريت بقْدر يوم إعطيكي بحر وبلاد فيها عْياد حتّى قول إنّي مش بخيل.

كانت حياتي قبل منّك متل صحرا... متل صُوره معلّقه عالحيط... راحو ناس فوق الخيل... زاح الليل حـتّى يمرْقو... وما عا بدهن يرجعو ولا تذكّرو اسمي ولا بيتي وين من بعد الرَّحيل... إنتي الوحيده المطرحِك بالروح... يللي شفافِك التفّاح من لبنان... يللّي ضحكتك متل الهَديل... حبّي لكي ما بينتهي هوّي القَبل والبَعد... هوّي نُور إيّامي ودَوا قلْبي العَليل... ...هلْقدّ بيحبّك جميل.

مهما ابتعدتي بالزمان بتقْربي، وتا تطْلعي من بْيوت شعري مستحيل... قدّام باب البيت عم إحْكي معك... متل الكأنّك هون حدّي... بتتركيلي شال أزرق مخملي وبَوسه أرقّ من الخَميل... وبتتركيلي عا قميصي ليل من رمش الكَحيل وبضلّ إسكر عالهدا وغنّي لكي

ويرجّ بالوادي الصدى: من قبل منّك ما حدا ومن بعد منّك ما حدا... وما في حدا من الناس حبّك متل ما حبّك جميل.

_______________________________

مشروع د. جميل الدويهي "أفكار اغترابية" للأدب المهجريّ الراقي - سيدني

#كتاب

23 views