Search
  • Jamil Doaihi

د. جميل الدويهي: رح كمّل السهر أنا ويّاك


كل قسوة الإيام ما بتعنيلي. كل رحلة العمر اللي فيها وجع، بشلحها بالنسيان. كل شي بيعذّبني بقدر إحملو وإمشي، تا يصير العذاب جزء مني. إلا عيونك وقت اللي بكيو. انجرح قلبي، وما بقدر إنسى إنّي بكيتك مرة. أنا اللي عطيتك فرح قلبي ودهب إيامي. أنا اللي سهرت الليل تا رمشك ينام. أنا اللي غنيت كلمة "حبيبي" تحت القمر، ورقـّصت الغجر... كرمالك. لا تزعل حبيبي، بتصير المدينة غياب. وعلمْني كيف بقدر إمحي الدمعة من عيونك... وأنا بيتي بمطرح بعيد، وسبقتني المواعيد... وهلق إنت وحدك، عم تتطلع بصورتي، فيك تسمع قلبي عم يحكي. وأنا تعلمت اللغة تا إحكي معك، وكانت حياتي ليل صامت. كنت ذكريات من زمن غابر. شجرة حور تعبانه تحت التلج والريح. الدمعة صارت سيف. صارت غضب من حالي عا حالي. وعم شوفك يا قمري العالي، هلقد زعلان... وحياة نورك الحلو اللي ضوّا عا بيتي، وعا الياسمينه اللي بتحبّ لفتاتَك. رح كمّل السهر أنا واياك... ويروح ليل ويجي ليل.. ما بتروح من بالي يا فرح الليالي. وما بنساك.

#كتاب

13 views0 comments