Search
  • Jamil Doaihi

كلود ناصيف حرب: تنين بيهرْبو من غدر الناس


وين بتروح؟

قِلّي وين بتروح؟

بتختفي هيك من الوجود

بحْتار من حالي

وين راح الغالي؟

بصير انا والطير

نفتّش بكل المطارح...

ونروح ع غابات ما فيها حدا

يمكن شوفك بهالمدى...

عرفو الفراشات حكاياتك

تركو الزهر والعطر....

وراحو خلف كلماتك...

سمع الحسّون همساتنا

وصار يغرّد عالشجرة اللي بتحبّها

ألحان متل ضحكاتك...

هديّه للبنت الصبيّه

صار عذاب روحَك

هديّه للبنت الصبيه...

اللي بتتخبّى بين القمح

وإنت بتلاقيها من عشيّه...

وتنين بيهربو من غدر الناس

مع كمشة أحلام...

وعيون ما بتنام...

إنتَ بتقول: حبيبتي.

وانا بقول: بحبَّك

تا يخْلصو الإيام.

البدايه

هيك كانت البدايه،

وكانت الكلمة روح للروح.

أمير السيف والموقف

وأميرة الكلمه الحلوة،

القاسية عالقلب،

الرقيقة عالروح.

هيي بتتخبّى بين القمح

وأنتَ بتخبّى بهاك الشجره.

وقت اللي كبرتْ

زرعتْ شجرة متلها

بين القمح،

تا كلّ ما عربشتْ عليها

تشوف الصبيّه،

وما تغيب من عيونك...

عيون الطفوله

اللي ما بتكبر إلاّ عا ضحكتها.

غنّيّه من أغاني الحبّ

عندي عذاب كتير...

عذاب من أعماق الروح...

خلّي مشاعري سرّ من أسراري

وخلّيني ساكته بهالعمر

وعم إكتب بدموعي افكاري

بركي بيجي الشتي

وبياخد معو العذاب

وبيرْجع ربيع العمر

يزهّر عا وراق الكتاب...

يا ريتَك عا طول قبالي

بتسمّعني كلمه حلوه....

غنيّه من أغاني الحبّ

يا طير الحبّ الغالي.

#كتاب

4 views