Search
  • Jamil Doaihi

كلود ناصيف حرب: أوّل مرّه


دبلو الساعات

دبلت النطرة

وهالوردة اللي فيها حنين

ما دبلت قدّام عيوني...

بعدها من عطر تيابك

عم تلبس وتصير أحلى.

رح قول إنّي مشتاقه

ويزعلو أهلي والجيران

رح قول بحبّك

وظلّك بسّ يمرق عالأرض

بيكون كلّ الناس عندي

وكلّ اللي بين السما والأرض...

وما عندي إلا وصيّه وحدي

خدها معك لوين ما بتروح:

"انتبه من عيون الحلوين"...

وبس ترجع رح إضويلك عا بابي

شموع الحنين.

لمين حروفك كتبتها؟

لمين هالابتسامه الحلوه؟

شفتك عالشط البعيد

عم بتلوّح بالإيد...

قولك في حدا غيري عالشطّ؟

لا ما في حدا

إلاّ أنا وطير البحر

والطير ما بياخد قصص العشاق...

والموج ما بيمحي كلام الحبّ.

كمشة حنين وأكتر بعتلك

كمشة أشواق وأكتر

كمشة ورد أكتر...

كمشة حروف...

كمشة عطر

كمشة موج

نطرتك حد البحر

ومرقت السفينه...

وما في حدا إلا أنا وإنت

والنجمه الحزينه...

وغنيّه حلوه تا تغفى

عا حضني وعا دقّات قلبي...

وأوّل مرّة قلتلّك:

أنا بحبّك...

أنا بحبّك.

#كتاب

0 views