Search
  • Jamil Doaihi

كلود ناصيف حرب: أنغام على قيثارة الحنين


كان في بنت زغيره

بتلبس حرير النطرة

وبتشوف بالمرايه

خيّال جايي من بلاد بعيده

وبيشلح ورده عا شعرها الطويل .

كبرو اللي بيحبو...

وصارت الحكايه شجرة

صار القمر اكبر

فوق الحور الاخضر...

وضحكة عينيها جنينة احلام

وكحلتها السودا حبر القلام...

ويا هالمزهريه

ضلي ابعتيلو نسمة عطر

بتخبّر عنها

والعبير ما بيحكي

بس بيكتب عا ورق الزمان

كلمة حب للاميرة الحلوة.

وبيسهر طول الليل

حد عيونها الحلوين.

***

كل شي بيوقع من السما

ورق الشجر...

النجوم...

الطيور الهربانه من الشتي...

الا حبك يا حبيبي

من الارض للسما بيعلا وبيكبر.

وكل يوم بحبك اكتر.

واذا لحظة نسيتك

بوقع من حالي

من برج السما العالي

متل الورق الاصفر .

***

صوتك حلم بعيد

سمعتو جايي من الفضا

بيسبق ندى الليل

بيرسم لوحة أمل لفجر جديد...

صوتك سحر ونهر

وعجقة ناس وخيل

وعا كل مفرق

نغمة حنين ما بتدبل

همسة فرح ما بتموت

وصوتك رح ضل اسمعو

وما بسهر إلا معو.

***

بس اسمع صوتك

بيحلا نهاري وبتروح الاحزان...

صدى الجمال الالهي صوتك.

***

بالسما، فوق...

مطرح الما بتوصل عيون البشر،

بشوفك إنت،

كوكب من نور،

مش متل الناس..

أحلى من القمر،

أعلى من المجرات.

أعظم من الكلمة...

أيّا ورده بتلبقلك،

وقلبك جنينه

وروحك ربيع النرجس والياسمين؟

لو بتعرف قديش عندي حنين...

بوقف عالغيمه،

وحدي... تا إلمس نور عيونك،

وما حدا غيري بيعرف أسرارك...

أسرارك متل السما.

وبشوف حالي

لأنو ما حدا متلي بيدخل عا قلبك...

قلبك وقلبي وعد مكتوب

عا لوح الخلود،

وإنت الخلود بروحي.

***

... وعندي حنين لروحك الحلوة

الأرق من الياسمين...

وقد السما والبحر والأحلام بيكون الحنين

بيعذبني

لكن حلو لأنو لعيونك الحلوين...

الحنين إلك وحدك يا حبيبي،

وبيفضحني قدام الناس،

ووين ما بكون

بيكون اسمك عا شفافي،

وكلما بهرب من إسمك

بيصرخ عا شفافي إسمك.

#كتاب

2 views