Search
  • Jamil Doaihi

د. جميل الدويهي: دمعة روحي


إذا كانو الأحلام ما بيصيرو حقيقة، الحقيقه فيها تكون حلم. وأنا برسم الأحلام عا ورق الشجر، عالغيمِه اللي مارقه، عا الرمل. والخريف وجع الغابات، والغيم بيسافر وما بيسأل عن حدا، ولا بيودّع حدا، والموج بيمحي الكلمات وبيضحك. سنين حبّيتك، وبخاف يصير الحبّ غنّيّه عا شفاف الوجع، والطير الحزين اللي كان يغطّينا بجناحو يتركنا ويروح عا بلاد بعيده. عا كل طريق المحيني، بكل صفحة اذكريني، بين كلّ سطر وسطر حاكيني. وإذا تركت المدينه، لازم تعرفي إنو النهاية قدر مكتوب، من وقت اللي خلقنا، وكل بدايه ما بتنتهي بتكون وهم وسراب. عم رتّب الزمان، تا لاقي مطرح بين اليوم وبكرا، والوقت لمّا سبقني، لحقتو عالطريق وقلتلّو: خلّيني إكبر معك، وكبرت، وصرت أعتق من الحيطان، وتمنّيت إرجع لمبارح تا خرطش عالنجمه، تا خزّق تيابي عالمفارق، وينساني العمر اللي مارق. لازم نتعوّد عالنسيان. لازم نتصالح مع الأحزان. لازم نعرف إنّو الذكريات هيّي اللي بتبقى... وما بيقى من الصوت إلاّ الصدى، وما في صوت بينتهي، الصوت بيروح بالمدى، وما منعود نسمعو، ومنفكّر إنّو الصوت بيتكسّر، وبكرا بس إحمل جروحي مرة تانيه وسافر لبعيد، ما تزعلي، هيك الطيور الغريبة بتودّع البيوت، وهيك أنا بترك دمعة روحي شمعة قدّام الباب، وكلّ الشموع بتنطفي إلا شمعة روحي. يا ريت كلّ الناس بيحبّو وما بيكرهو. يا ريت العالم متل قلبي وقلبك. ساعتها الموت بيموت عالرصيف. كرهت الحريق وصور الولاد المشرّدين. فزعت من وجوه الأبطال والحاكمين. وعم إصرخ بهالليل: يا ليل روح... ولا ترجع، ويا ناس افرحو كلما شفتو تنين عاشقين. افتحي الكتب، واهربي بين الحروف... ارجعي طفله زغيره تا تفهميني... وتخبّي من الناس بين السطور... قد رمل البحر كتبتلك، قد السما والعطر سهرتلّك... وقد ما في بقلبي حنين غنّيتلّك. وصورتي اللي بين إيديكي كل يوم بتقلّك. هلقد اشتقتلّك.

#كتاب

10 views