Search
  • Jamil Doaihi

كلود ناصيف حرب: كيف ببعد عنّك؟


كلما بغمّض عيوني من تعب الايام بتكون انت بعيوني... وهمساتك وضحكاتك عالاحلام بيلحقوني. خبّرني كيف بهرب منّك؟ كيف ببعد عنّك يا حارس الليل؟ معك ما بعرف الاحزان...

بكتب "حبيبي" عا قمر الزمان... ولولا نورك يا قمر حياتي

كانت حياتي مكتوبه عا دفتر النسيان.

***

ورق الغابات خبّرني عنك... دهب الحور لبسني اسواره

وقلي انك ناطر ضحكة عيوني... عالبحر كتبت اسمك.

عالورده.

عا حرير النسمه.

زرعت حبّي الك عا حدود السهل... طلع شجر اخضر وغناني الحصادين حبَّك سيمفونية عمر فيها الغضب والهدوء... فيها الشتي والصيف... فيها انا وانت وحدنا

قصيده بلا عنوان.... انكتبت قبل الزمان ومتل حنيني الك... بتتمرّد عالنسيان.

***

ضجرتْ منّي الحيطان.

وحاسّي كاني وحدي بهالزمان...

عم ارسم عالغيمة صور ناس راحو

وناس عم يخلقو من الاحزان...

لا خبر منّك يا قمر

قولك انت راضي

والاّ انت زعلان؟

وهالصورة قدّامي بحاكيها

وما بتحكي....

وعيون ما بيتلاقو الا بحلم هربان.

***

·

يمكن يغيروك الناس يمكن يحملوك الايام عا مدينه بعيده وانا رح ضلّ انطرك عا المقعد تحت الياسمينه متل الطفلة الوحيده

سكوتك بيحاكيني

وكلما يضْوي قمر الليالي رح تضْوي صورتك ببالي... ورح تبقى عندي اغلى من الغالي

واعلى من البرج العالي.

#كتاب

4 views