Search
  • Jamil Doaihi

كلود ناصيف حرب: ضلّ تذكّر عصفورة الفرح


شو بيشبهك هالغيم المارق

عا مفرق العمر

بيروي حديقة الروح

بندى الصباح...

وكلما بتشرق الشمس

بودي رسالة محبة لقلبك الكبير.

بس تغيب عن عيوني

بيصير دمي حبر أحمر ناشف،

وقلبي طير مربوط بحبال.

ما بيهمني حدا من الناس،

بيهمني إنت وحدك،

وبس تروح من قدامي

برحل عا بلاد

ما بعرف فيها حدا،

ودموعي بيصيرو البحيره

للي بيغرق فيها القمر.

لا تجمع حروفي عالورق

اجمعهن بقلبك

دفتر الحنين....

وضل تذكر عصفورة الفرح

ووردة الأمل

عم تسكب عطر وسلام لعيونك

وحبر عيونك بيكتب كلمه

هيي كل اللغات: "بحبِّك"...

يا ليل لا تخفي القمر

عن بيتي والأحلام

واتركني إكتب أنا وحبيبي

غنيّة حب هيي الخلود.

بعدَك على بالي

وخْيالك قدام عيوني

ساكن عالمفارق

وما بيفارق...

وشوف الناس كيف بيسألو:

شو صار بهالصبية

بالضيعة المضويه؟

كان عندا شال من حروف وقصايد

وشال الحرير طار بالهوا

عا جسر الهوى

وكان في خياّل مارق

شلح للصبية إسوراة ياسمين

وعقد نجوم...

وراحت معو عا بلاد

ما فيها غير الحنين.

وين كنت يا حبيبي؟

يللي عيونَك بيشبَهو الصلا؟

وين كان كلامك الحلو

ما عربش عا حيطان الضجر،

وخلص طفولتي من الأحزان؟

بيقولو ليش أنا بحبك؟

وبقول: ما في مرا ما بتحبّ مرايتها.

بتعرف؟

مبارح كنت عم صوّر عا الحيطان صوره،

وكلما كنت إمحيها

كانت تهرب من الحيطان

وتعلق برموش عيوني.

#كتاب

7 views0 comments