Search
  • Jamil Doaihi

كلود ناصيف حرب: زرعت ابتسامتك عالمخدّه


عيونك موسيقى

وضحكتك مايسترو...

وهالغابه اللي كانت سكوت وليل

لبست ربيع الزهر.

مرق طيفك

صار ورق الحور قصيده

وقصة حب جديده.

وانا رجعت عالبيت

كان صوتك معلّق عا شالي.

خبّيت حالي.

خبيتك.

وزرعت ابتسامتك عالمخدّه

تا تبقى طول الليل....

طول العمر حدي.

***

الشال اللي خبيت صَوتك فيه

تركتو ع معقد الحنين

تحت شجرة الحور

مطرح ما حفرنا أسامينا

وغطى الهوى قصتنا...

بتتذكر يا قمر نوار ليالينا

وأغانينا؟

هونيك ضحكو عيوني

وغرقتْ بالأحلام

وسافرت معك

مع قلبك اللي كلو أمان.

***

بعدو الحلو فاكر

والا ناسينا؟

مبارح كنا عا درب العين

ولا تنسى شو حْكينا

يبسو القوافي بضيعتنا

وهجرو الطيور جيرتنا...

وانا انا...

بعدني هون

عم انطر مع كل يوم جديد

ساعي بريد

يخبرني عن أحوالك

ويعطيني باقة ورد...

ويقول بعدك حبيبي

وإنت القبل والبعد...

***

لا تغفى يا عصفور الشجر

ضلك غنّي حتى بشهر كانون

بخاف يضيع قمرنا عا مفرق البيت

ويروح عا غير درب

ويختار صبيه غيري

ويخطفها ويروح...

ساعتها بيختفي لون الفرح من حكايتنا

وبتموت القصايد اللي كتبتها

وبتموت وردتنا...

رح خيط من جديد شال الحرير

اللي حبيتو

من شعري الأسود الطويل

رح اترك همسه من عيوني

عا كل درب بيودي لعندك

وكلما هب الهوا

بيخبرك عن قلبي اللي حبك

وبيوصلّك أشعار كتبتْها يوم اللي التقينا

والتقيو عينينا...

وبتسمع من بعيد دقة قلبي

متل نغمة حنين

عا وتر من عبير الياسمين.

#كتاب

5 views0 comments