Search
  • Jamil Doaihi

كلود ناصيف حرب: معزوفات على جسر الحنين


طلبت من حبيبي ورده

عطاني جنينة ورد...

طلبت من حبيبي نجمه

عطاني سما...

واستحليت جزيرة اسكن فيها

عطاني بحر وبلاد...

وقديش حلوة جنينة الورد

اللي سحر كلامو فيها!

وشو غميقه هالسما

اللي صورتو فيها!

وشو هادي هالبحر وازرق...

بيروح مركبي لبعيد

وعيون حبيبي المواعيد

ومرفا حنيني...

ومع كل موجه لعندو أفكاري بتوديني.

بين العتم والريح

تاركني لحالي

لا الحبر هوي الموج...

لا الورقه صارت مركب...

كيف بيخلق الحكي من سكوت؟

وانا ما بشوفك ولا بلاقيك

ولا بتبعتلي صورة

تا اتطلّع فيك...

وهيك العمر نطرة خلف نطره

وكل يوم بقول:

يمكن يجي بُكره...

الوقت عم يسرقني

السطور عم تهرب من أفكاري...

وعم اكتب لك بالريشه عذابي...

وانتظاري.

قولك النوم صدفه؟

قولك الحروف وجع؟

هيك واقف الحبر بين السما والأرض

ما سمعت صوتو...

وحدا غريب قلي انو الغياب سكوت

وقلي انو القمر

ما بيطلع فوق الغابه الحزينه...

رح انتظر عالشط

بركي بتمرق السفينه

وبتلوّح لي بمنديل...

ورح ضل سهرانه عالجسر

انا والليل الطويل...

تا شوفك متل الكذبه

ولو غفيو القناديل.

مبارح سهرت حد القمر،

وطال السهر...

وكان في غيمه وقفت قدامي

زعلو قلامي...

وصار الشتي يدرز تياب

عا قياس الشجر.

#كتاب

6 views