Search
  • Jamil Doaihi

جميل الدويهي: فستانك الأحمر


هيدا فستان أحمر،

أو إنتي ورده لابسه ورده؟

هودي زرار

أو قمار ورده يا أغلى ورده؟

يا رفيقة ليالي السهرانين...

يا قمر الحلوين...

عبيرك سبقني عاالطريق، لحقتو...

وقلّي: مش عبير ورده أنا،

أنا سحر من عالم تاني

من كواكب عاليين.

***

مبارح كنت عم إحكي عنّك،

والناس عم يسمعو...

وقالو: مين هيّي؟

وليش هيّي غير الناس؟

بيروح الزمان وبتبقى،

متل الوجع بتبقى،

والحبر دهب عالورقه؟

كلما فكّرت فيها

الشعر بيصير ورده عا شفافي،

والكلمه بتصير حديقة ياسمين.

يا هالفستان الأحمر،

ليش بيني وبينَك عتم السنين؟

قولك إذا حبّيتك بتخلص الدني؟

قولك لازم سكّر بوابي

وقلّك: خلّيكْ بعيد عن أحلامي....

وبعيد عن إيّامي؟

قولك إذا استحليت أهرُب بغابة عينيها،

وضِيع بين إيديها

بتبطّل الشمس تطلع،

وبتوقَع السما بالبير الغميق؟

***

رح ضلّ إتطلّع بهالصورة،

وقول بحبّك.

ورح ضلّ إحكي معِك تا يضجر الحكي.

وما بسألك ولا مرّه عن حالِك...

ولشو بدّي إسألِك...

يا قمر عا بالي

يا ضحكة الليالي...

وإذا بتروحي من خيالي

بينبح موالي

وبخسر زماني ومكاني

وكل شي غالي.

#كتاب

11 views