Search
  • Jamil Doaihi

أوجيني عبود حايك: سألت الغربه


سألت الغربة: ليش في ناس

بتنسى اصلها وبتعيش الوهم الكذاب ؟

ليش في ناس ما في بقلوبها رحمة وإحساس؟

ليش في ناس بتبيع ضميرها كرمال ورقة عملة...

ما بتعرف أنو الكرامة ما بتنشرى ولا بتنباع؟

سألتها: ليش الجشع معلّي مدماكو؟

في ناس تربوا عالمنافسة السودا والغيرة والحسد...

عايشين بسباق شرس

الحقد عامي القلوب

والأنا خاربي العقول

والضمير بيهربو منو الناس

ويمكن بيضحكو عليه وبيقولو:

ما بيطعم خبز

ولا بيغْني بهالإيام...

ليش في ناس بتنظلم؟

ليش رخصت العشرة؟

والمودة صارت كذبة؟

المصالح والشر عّم يكتر

والخير عّم ينهان...

سألت أسئلة كتيرة

والغربة صبورة وعم تسمعني

الغربة بيقولوعنها قاسية

بس نسيو إنّو رحبة

يا ما استقبلت ناس

وقامتن من العدم...

الغربة مراية تاريخ ما بينمحى

الغربة ما بتكذب

بتراقب وبتهزّ براسها

ردّت عليّي: ما تخافي الدني بعدها بألف خير

بعد في ناس قلبها كبير

صبورة وصادقة بتخاف الله

وبتآمن ما بتتغيّر

مهما صار فكرها راقي

وطموحة والدني دولاب

ما تهتمّي القشور بتطير بالهوا وبتعلّي

والأصيل نبيذ تقيل معتّق بالخوابي ما بينتزع

بالعكس بيطيب الأصيل

جذورو مشلّشة بالأرض

والكف النضيف مجرّح

خبزو معروك بعرق الحبين

قالتلي : ما تغرّك الأحذية الملمعة

والماركات الكبيرة

والسيارات الفخمة

العِملة المشبوهة ما بتعلّي مقامات

والكبير بيضلّ كبير

مرجع خميرة انعجنت بتجارب السنين

بيعرف الحقايق

ما بينضحك عليه بغمرة كذّابة

وكلام منمّق

وبوسة يوضاس...

والكلمة الحرة منارة صداها ما بيموت

بتشبه اصحاب الكرامة

يللي مهما تحاربو ما بيتزعزعو

مهما تسكّر بوجّهن بواب ما بيتراجعو

وين ما بيروحو بيزرعو أرزة

وبيرفعو علم

بيحملوا قلم وبيكتبو الحب والواقع والأحلام

وبيرسمو بالكلمات طريق الحرّية والتاريخ

بيكتبوا كلماتن بحبر الوفا

وبجمر الحنين

جبينن عالي متل الأرز ما بينحني.

#كتاب

5 views