Search
  • Jamil Doaihi

كلود ناصيف حرب: من دفاتر الحنين


كل يوم بيزورني هالعصفور...

ما بيحكي...

وبيحب يسلم عليي

بس بيخاف لانو جناحو مكسور.

ومقهور صرلو شهور.

وحبيبتو قريبه...

بس بعيده

خلف سبع بحور.

بتتطلّع بالصور وبتشوفني

وبيقولو الناس: انت حرامي...

بتسرق كحل العيون...

بتسرق اللهفه...

حتى الصوره كتيره عالقلب الحزين...

واذا حاكموك لانك سرقت

بعرف شو رح بتقول:

كان بدك القمر

والقمر عالي كتير...

والصوره جسد مش روح...

ورح تسأل القاضي:

دخلك؟ ليش هالصور الحلوين بيقصّو الروح؟

حبيبي إنت يا قمر عا بالي اشتقت اسمع همسك بالليالي وضحكتك اللي بترن متل الدهب الغالي . وعا بالي أتطلع فيك تا اكتشف أسرار

اغمق من الأفكار. انت ساكن بقلبي. ورح ضل قول وما خبي: انت عمري وذكرياتي يا اغلى من حياتي قريبة منك وما بلاقيك... بعيد عني وبفكر فيك... والناس بيشوفوك بعيوني وعنك بيسالوني.. ووين بقدر خبيك؟ وأنا هيك بحبك.

#كتاب

0 views