Search
  • Jamil Doaihi

أوجيني عبود حايك: طيف الاستقلال


الدني واسعة بس القلوب عم بتضيق

المحبة كذبة

والوطن غربة

ليش عم نتغيّر؟

عم نبتعد اكتر؟

ما بقا في وقت حتى للمعاتبة

المنافسة عم تهدم جدار المحبة

والمصالح خاينة ...

عا مهلك يا إنسان

مش رح تاخذ معك لا مال ولا جاه

رح تروح حافي بدون توصيات

الآخرة ما فيها واسطة

الآخرة محكمة الحقيقة الغامضة

صندوق مقفول

والجسد رماد

ليش القلب هربان والأحلام غافية؟

الأصوات فقدت قيمتها

لما الكلمة صارت وعد كذّاب

ناس بالعناية الفايقة مغيّبة عن الحقيقة

عم تشحد من العمر دقيقة

وناس بايعة ضميرها عم تقبض

مقوّاية قلبها

مش عارفي الخضوع بيشبه الموت البطيء

والكرامة بيصير لونها اسود

لما بتكون رهينة

وخيوط العنكبوت بتشبه السجن...

ليش الشجاعة صارت اسم

والإستقلال غافي بكتب التاريخ

والغبرة سميكة كتير؟

ما ابشع الذلّ !

الحاضر بيشبه مراية كذّابة

الوجوه صفرا

والذاكرة صارت ضعيفة

نسْيتْ الماضي...

نسيت كيف بتكون الشهامة

الماضي انختم بالشمع الأحمر

وانقفل عليه

ورجال الإستقلال ودّعو

صاروا خبرية الوطنيّة المفقودة

ناس عم تتنازل

وناس بايعة ضميرها

عايشة بالوهم

والطمع ما بينام

ناطر عالسكيت...

يا خوفي نوعى شي نهار

وتموت الأحلام

ونصير اشباح بوطن نخاف نواجهو

نخاف نتطلّع بعيونو ونشوف الإتهام

ويكون الدم يلّي انهدر راح ضيعان

يا خوفي البطولة تنحني

وتصير صورة مشلّعة بكتاب!

يا خوفي ييبس الأرز ويدبل الزيتون وتموت المواسم

نخسر هويّتنا

وتصير حروفنا كذبة

وتختفي الأسامي.

#كتاب