Search
  • Jamil Doaihi

أوجيني عبود حايك: ناس وناس


في ناس ما بتنفهم بتشبه الكذبة مهما حاولت تظهر عكس حقيقتها وفي ناس متل العملة النادرة كلّن أصالة ... صادقين بيرسمو السعادة كل ما طلّو بيشبهو طيّارة الورق الملوّنة عا طرقات الفرح ولاد صغار ماسكين خيطانها عّم يكبرو من دون ما يعرفو والعمر حرامي عم يغفلن ما كانوا عارفين إنوا رح يشتاقو ويتوجّعو وانو الخيطان شبكتن وخيّطت إيامن بإبرة سحرية في ناس بيذكّروني بقنديل الكاز يلّي كان يضوّي عتمة إيام زمان وشاشتو البيضا يللي عم تحترق تا يصير الضو احلى وصبية شعرها طويل قاعدة عا كرسي بالزاوية وخيالها مرسوم عالحيط وشب ناطرها تلتفت حاطط بكتابها وردة هيّي عّم تتكبر القلم بإيدها عم تخرطش القلب عّم يدق والدرس هربان الخيال شارد والعتمة ريشة فنان في ناس بتذكرني بالبحر والمينا والبحّارة السارحة بمراكبها بالليل عا طريق المجهول ما بتخاف العاصفة والبرد قلوبها مضوّاية بالإيمان في ناس فلّوا عَا غفلة كان صدى صواتن يودّي متل صدى الوديان كلّن شهامة وعنفوان وفي ناس وجوهن بتذكّرني بدكّان السكاكر يللي بالعيد بيزدحم اكتر بولاد الحي الربع ليرة عم تلمع وتلمع معها عيون الطفولة يلّي ما بقي منها الا صدى وصور معلّقة عا حيطان الذاكرة المشتاقة ما بقي منها الا شبابيك مشلّعة عّم تسرق النظر عالسكّيت وتشحد الدفا من الشمس قبل ما تغيب عا صوت تراتيل وصلا وايمان وجراس عّم تطن والشمعة عّم تدوب عالهدا يمكن عم تتكهّن شو في بالقلوب والصبية خيالها عم يلوح مع البرداية كلما عصفت الريح ورعدت الدني الصبية صارت حكاية انحفرت بذاكرة الشوق وسكنت ببرج عالي.

#كتاب

0 views