Search
  • Jamil Doaihi

كلود ناصيف حرب: هالصورة ناقصة حدا


شو عم يحكو عيونك؟

شو عم بيقولو أسرار من كتاب عتيق..

من بحر غميق؟

بحبِّك بحبِّك بحبِّك.

سمعتها من نبض قلبك.

من رمشك اللي كان متل جناح سنونو...

من لهفتك عليّي...

أنا وإنت متل النجمه والنور،

متل الصلا والبخور.

تسلملي هالغمره شو رقيقه...

هالعطر اللي اندلق عا تيابي.

هالضحكه اللي بترن

مشغوله عا إيدين جوهرجيه.

بتقلي: إنتي حياتي وذكرياتي...

والعمر اللي باقي

لو ما إنتي كان شمعه مطفيه.

وهيك بحبِّك.

قديش في صور

هني وجع بأحلامنا...

وضحكه بإيامنا.

هالصورة ناقصه حدا

هوي إنت إنت إنت...

وكيف ما بحيك يا قريب وبعيد.

يا حبي الوحيد؟

من دفا قلبي هالشمس.

من صفا قلبي هالغيم الأبيض.

مراية روحي هالنهر.

وكلمتين كل شي بيحكي الك حبيبي:

سلامي وحبي.

وهني كل اللغات.

هالسما اللي بتعطي خير،

بتضحكلك وبتوديلك شمس وغيم أزرق،

وعصفور زغير تا يوشوش عا شباكك.

بتبعتلك نجوم تا ترافقك بالليل،

وقمر تا يحرس طريقك.

وأنا ما بصلي كتير،

بس إنت بصليلك،

وشمع بضويلك ...

تعلمت الصلا يا حبيبي تا يغفو عيونك وأنا سهران،

تا يفرح قلبك،

وما تغيب هالضحكة ولا يوم.

والموت عندي أهون ما إخسرك،

لانك حياتي الحلوة.

وهيك عا طول بحبك.

وين الكلام؟

الحروف قليله.

السطور ما بتساع حنين القلب.

وعيون عم بتسافر بين مبارح وبكرة .

وبيبقى من العمر ورده وقهوة الصبح.

بيذكروني فيك.

ورغم احزانك ما بقدر احكيك.

والحب اذا ما كان تضحيه بيكون كذبه

والحياة مع الكذبه صعبه.

وهالقلب اللي صاير متل دخنه...

متل ورقة خريف طايره بالريح

هوي قلبي .

#كتاب

3 views