Search
  • Jamil Doaihi

كلود ناصيف حرب: نغمات من عصفورة الحنين


تسلملي...

أول مرة بقولها

وبقولها لأنك قمر الزمان

وشعوري بالأمان.

لا تزعل حبيبي ولو كنت بعيده...

انت النور بقلبي ورفيق دربي.

تأخرت تا قلك: تسلملي...

ريتك تسلملي...

وانا بحبك اكتر من مبارح

واقل من بكرا...

ولانك فرحي وضحكة عمري بحبك...

من حصاد الايام الحلوة...

ر بيع العمر الأخضر

كل شي بيذكرني بحضور أنيق...

رفيع...

من زمان ممالك عابرة...

الأميرة عم تلبس الكلمه

والبراويز ما بتساع الحلم...

ما بتحبس الفكرة

وكل يوم عندي بكرا

كل شي بينمحى

إلا حبر الكلمات المكتوبين بالحنين...

هني نار ونور...

ومجد السنين.

بكتب كل يوم احلى

لانو قلبي بيحب كل يوم اكتر

القنديل لو ما بقي زيت

من ابتسامه بيضوي...

من نظرة حلوه...

الحب متل الطيور المسافره بيقطع مسافه

بيتعب وبيفرح

وما بيتطلع لورا....

ومن حروفي كل الفرح وكل الجمال.

وردة حبي بيحرسها ملاكين

واحد ابيض متل قلبك

وواحد متل قلبي

قطفتها من حديقة عمري

تا يفرح عمرك يا حبيب روحي وايامي.

وهيك بحبك.

كيف الطير المشتاق بيفارق شباببك مفتوحة؟

والحنين غنية...

والبحر كبير وغميق متل عيونك.

الطير لو بيطير لورا كان حبك انت وزغير...

وكان العالم تغير.

بتعرف قديش بحبك؟

لا ما بتعرف

لانو حبك من عالم السحر...

وروحك ما بتلبق إلا عا روحي انا.

وهيك بحبك .

واكتر من هيك بحبك.

متل الطفل الصغير

اللي ناطرة هدايا حلوين

هيك هالصبية بتنطر حروفك اليوميه

تا تزين فيها كحل عيونها

وهيك بقلك

متل النسمه والبسمه

بيمرق سلامك عليّي .

كتير حلو حضورك

ورقيق شعورك

متل رفيف الشجر

متل موج هادي

متل ابتسامة بنت زغيره موعوده بالقمر.

انت القمر يا نور عمري.

ولو ما انت معي كان الليل سكن بعيوني

وقنديل الضحكه عالارض انكسر.

وهيك بحبك.

واكتر من هيك بحبك.

لا تزعل يا قمر الحكايه

كل لحظة فرح

بتساوي سنة عذاب

والإيام جايي.

كل ورده هيي رسالة من قلبي إلك

باللون الأحمر بكتبلك حبيبي،

باللون الزهري اللي بتحبو،

وكان مره عا شفافي ضحكه،

واللون اختفى لما زعلنا،

وليش تا نزعل؟

وإنت بقلبي معبد وشموع وفرح أعراس.

إنت إنت إنت...

عا مد النظر كل جنينة ورد.

ولو ما أنا بقلبك كان الحبّ انكسر متل قنديل،

وما بقي عالأرض حدا بيحبّ،

إنت وأنا الغنيّه والنجمه الصبيه...

نغمة عُود للخلود...

حكايه حلوه بحرسها برموش عينيّي.

وهيك بحبّك... بحبّك... بحبّك.

#كتاب

4 views