Search
  • Jamil Doaihi

كلود ناصيف حرب: كلّ همسِه منّك عيد


قولك أنا إنت؟

أو إنت أنا؟

بس أنا هاديه وإنت بتغضب.

أنا رقيقه وإنت بتقسى.

ما بدك غير توقفني عالحيط،

وتحاسبني عا غلطه.

معليش حبيبي، حاسبني... وعذبني...

وأنا بسامحك لأنك بتمون عا روحي

يا أعز من روحي.

كل همسه منك عيد،

وانت فرح العياد.

كيف بتقسى هيك عليي،

وبتعرف قالبي رقيق،

وبتجرحني النسمه،

وما إلي دوا إلا صورتك،

وضحكتك،

وهالبسمه..

وهيك بحبّك

وهيك بتعذّب بس تغيب عني...

يا ريت فيي سافر هلق،

متل ما بيسافر اليمام عا بلاد الأحلام،

تا إغمرك،

وما يكون في حدا...

ما بحب اغمرك بين الناس،

الفرحة بتكون ناقصة.

إنت ومعي بروح عالنسيان،

بغمض عيوني وبنسى الزمان.

إنت ومعي خلي همسك يحكي،

خلي عيونك يحكو ويقولو: حبيبتي اشتقتلك.

ياااا ريت حدك هلق وبعد هلق.

إحرس لياليك...

مشط شعرك بعطر الليل.

وعيونك يضحكولي.

وما في بالعالم أغلى من هالضحكه،

المشغوله عا دين جوهرجيه،

شفاف متل الخاتم،

وأنا من زمان بحب هاللون.

هالكون اللي هوي إنت إنت إنت...

وما حدا غيرك إنت يا حبيب عمري.

بتعرف شو بدي قلك؟

سافرت لبعيد عا جبل المواعيد

مطرح ما طار عصفور الشوق

كتبت بلون قوس القزح كلماتي

وصرخت باعلى صوتي

تا يسمعني الكون

وقلتلّك:

اشتقتلك اشتقتلك اشتقتلك.

سبقتك وبعتلك سلامي هالمره

ومتل كل مره لونتو ببسمة من قلبي الدافي

وغنيت معو لحن القوافي.

تا ترجع ع طريق بيتنا

بعد كم لحظة

رح أسرق كمشة أشعار من غابة الحروف الهجائيه

وكمل موسوعة غنيس العالميه

وأكتب بحروف مضويّه

هالكلمة من الشرق للغرب...

وقلك: هلقد اشتقتلك.

#كتاب