Search
  • Jamil Doaihi

كلود ناصيف حرب: شو بدّي أغلى من هالعيون؟


لو فيك تطلع من الصورة

تودع سكوتك.

تودع الوانك...

والضحكة تكون الي وحدي.

زعلي طوّل كتير

لأنك عا جنينة حنيني ما طليت.

سكرت بواب البيت...

بواب العمر.

وهيدي اشواقي

وهيدا الزعل اللي واقف عالطريق كل اللي مني باقي.

يا قمر لا تطول الغياب

وترجع بالسلامة ع حينا

وتضحك الدني بطلتلك...

وصوتك...

قمر الزمان حب يتعرّف عالناس...

نزل من السما

وصار يمشي عالارض.

ولأنو ما بيشبه حدا...

ولانو بيضحكلي عالهدا

هيك بحبو. ..

واكتر من هيك بحبو.

خسرت كل ما عندي

وربحت كل ما عندك...

شو بدي أغلى من هالعيون؟

من هالنظره اللي بتقول: انتي حبيبتي؟

أسرارنا ما حدا بيعرفها غير الليل والقمر...

مطرح ما مشينا فتح الورد

وكتبت اسمك عالشجر...

اسمك صار غنيه لطيور مشتاقين...

وهيك بحبك انا عصفورة الحنين...

واكتر من هيك بحبك.

نغمات من عصفورة الحنين

إلى طير الياسمين...

شمعة حبي ما بتنطفي...

وقلبي حبيبي عنوانك...

مهما كنت بعيد

بيناتنا جبال ومسافه

بتعرف وين البيت...

مطرح ما الورده شلحتلك عبير.

وشَعري متل غيمه

وكحل عيوني الاسود اللي بتحبو

بيضحكلك يا اغلى امير.

وبيقلك: انت انت انت

وحدك الحب الكبير.

#كتاب