Search
  • Jamil Doaihi

كلود ناصيف حرب: مطرح ما شلحت عطرك


السنه ناقصه كلمه

لا انت بتقولها

ولا انا

لانو اللي بيني وبينك أكبر من كل المشاعر

اغمق من التفكير ...

بيني وبينك كتاب صلا

إي... كتاب صلا وعباده...

وروح بتسافر عا مطارح بعيده.

بقطف الزهره الحمرا

وبسأل: بحبك؟ ما بحبك؟

اكيد ما بحبك...

اكتر من بحبك بكتير

يا حبيبي الأمير.

يا فرحي الكبير.

وهييييك بحبك.

ليش حزينه هالنظره؟

ليش بقلبي اسرار مخبايه

وسؤال عن عمر جايي؟

ليش بين الناس ما بلاقي حالي

كانو جناحي مكسور...

كأني ضيعت جزء من روحي وما عدت لاقيه؟

يا ساكن بعيوني وما بشوفك بعيوني.

يا حلم زماني والأحلام بعيده .

عالمفرق نطرتك تا اغمرك مره ...

تا قلك قديش بحبك يا امير الفرح...

عمري قبلك كان موال انجرح

وعمري معك هوي العيد

وخيمة المواعيد

وكل حب جديد.

وأكتر من هيك بحبك.

قولك ليش هيك تغير لون الفرح؟

شو صار تا ما عاد يزهر موسم الربيع؟

يمكن من شتي الايام والبرد القاسي...

يمكن من قوة الشمس وحرارة الصيف ..

يمكن قد ما غرد عصفور الصباح

انبح صوتو

وما بقي غير الصدى ..

رح جرب من جديد

اقطف حروف من دهب

مطرح ما شلحتْ عطرك يا حب

عا شالي الأخضر

ولونت شجر الخريف بعطر الورد...

يمكن بالموسم اللي جايي

يرجع معي كل اللي غاب

وارجع إلك يا قمر المواعيد:

وقلّك يا حبيبي:

انت انت انت وحدك ... كل العيد.

#كتاب

4 views0 comments