Search
  • Jamil Doaihi

كلود ناصيف حرب: بتمرق سنه وبعدا سنه


بتمرق سنه متل الحلم،

والأحلام جزء من الواقع،

وتعلمت من أحلامي ورح ضل اتعلم.

وإمشي وإمشي لقدام. وبعيده الطريق.

ورغم كل الصعوبات عندي شجاعة إني كمل مشواري،

وسلاحي هوي القلم والمحبه والوفاء.

هيك كانت كلود بالسنه الماضية وبالسنين اللي قبل،

وهيك رح تبقى،

لكن المسؤوليه كبرت،

وأنا ما بخاف من المسؤوليه

لأنو الإيمان بالله وبقدراتي بيقويني.

وثقتي بنفسي نور عا جبيني.

من هيك بطلع جبل وبنزل وادي،

وبقطع بحور،

ومهما تبدلت أحوال الزمان،

بيضل عايش فيي الإنسان.

وبضل مجّد الله والفكر والوطن الغالي وين مكان.

عم إقشعك بالكلمات...

بعنين الشجر.

عم إلمحك عالشبّاك واقف متل البرج.

متل ما انت.

ساكت وغميق.

أسرارك أبعد بكتير من البحر الكبير

صرخت: بحبك...

انكسر قزاز الصمت.

انكسر تلج انتظاري.

وما سألت وينك؟

لأنك ساكن بأفكاري.

وهيك بحبك...

قلي حبيبي بالعيد:

انتي خلقتي بقلبي.

وحملتك عا ايديي

ومرجحتك عالمواعيد

تا كبرتي وصرتي صبيه .

وعطاني حبيبي هديه ورده مخمليه...

وابتسملي بعيون حلوين.

عيونو يا امي كتير جهلانين.

بيتنقلو من مطرح لمطرح وانا بستحي.

كل الناس عيدوني بعيدي

بس هوي عيدني باسوارة جديده

وحبسني من ايدي.

وشو بدي اغلى من هيك.

وكلمة حبيبتي كتبها عا ورقه.

ورسم عا الورقه زنبق الوادي...

واول مرة بحياتي قلت:

بحبك بحبك.

وصارت الكلمه شمعه بعيد ميلادي.

بعيد ميلادي فرحت

ورح افرح كل يوم

لانو الوردة اللي زرعتها هيي الخلود

وما بتموت انا وحدّك..

وانت وحدك وحدك يا حبيبي.

صباحك احلى صباح.

قلبك اغلى قلب.

لا بسوق الدهب

ولا باشعار العرب

لقيت متل روحَك يا ورده رقيقه

وجمال الحقيقة.

كنت قبلك صحرا. ..

حياة جامده ما لها مضمون.

وحياتي معك جنينة عبير.

وكل يوم بقول: تسلملي وحدك وحدك...

ويسلمولي هالعيون.

وهيك بحبك.

حديقة ونهر..

مؤنث ومذكر.

مين قبل مين؟

ومين بينطر مين؟

بسأل حالي...

أنا بنطرك تا تمرق بأفكاري

وتلون فرح نهاري...

وهيك بحبك.

قديش بكتبلك ؟

وبنطر كلمه حلوه.

بيروح التران

وببقى عالمحطة ناطره.

تحت الشتي ناطره.

ليش حزينه هالنظرة؟

ليش بقلبي اسرار مخبايه

وسؤال عن عمر جايي؟

ليش بين الناس ما بلاقي حالي

كانو جناحي مكسور؟..

كأني ضيعت جزء من روحي

وما عدت لاقيه؟

يا ساكن بعيوني وما بشوفك بعيوني.

يا حلم زماني والأحلام بعيده .

عالمفرق نطرتك تا اغمرك مرّه .

تا قلك قديش بحبك يا امير الفرح.

عمري قبلك كان موال انجرح

وعمري معك هوي العيد

وخيمة المواعيد...

وكل حب جديد.

وهيك بحبّك.

#كتاب

4 views