Search
  • Jamil Doaihi

أوجيني عبود حايك: يا هالعيد الجايي


يا هالعيد الجايي من خلف الضباب من عمق السنين والمسافات البعيده ما بتتأخّر ولا دقيقه عطول بتوصل عالوقت بتضوّي الدني كأنّك مفتاح الفرح وصدى الأيمان وصوت الضمير تراتيلك حكاية حلوة منرتّلها ومزودك تواضع وطفل مغارتك أمل مننطرو تا يمحي خطايانا ويجدّدنا ناطرينك الصغار والكبار والمرضى والحزانى والمتروكين والمشرّدين بركي بتتحقّق احلامن بركي بيخف الوجع وبيتأمّن الدوا بركي بتتوانس الوحده والضيق بيزول بركي بِعِم السلام وبتنجلي الغيوم وبيصير في فرح حقيقي ناطرينك تا تخلّص القضايا المعلّقه ناطرينك تا تشرق شمس المحبة من جديد وينطفي الحقد والتكبّر من القلوب وما يعود في طمع ووجع وأنانيه وجوع ويعم الأمان والإستقرار عالأرص يا هالعيد بوصّيك بولادي وعيلتي ما بدّي هدايا ما بدّي افتح وراق ملوّنه عندي بس طلب صغير انت بتعرفو سرّ بيني وببنك.. ويا ريت بطريقك تجبلي معك رسالة مكتوبة بخط إيد اشتقت إمسكها وبوسها عا قد ما بتنباس.. قليل جبلي معك غمرة كبيرة دافية بتروي سنين الغياب وصوره تا اتطمّن إنّو منيح وشوف اذا بعدو متل ما كنت شوفو مارد حلو قولك بعدو بيشتقلي متل ما بشتقلو؟ اشتقت يحملني وإتعلّق برقبتو وشمّ ريحة الأراميس انا ناطره متل ما كنت أنطر انا وزغيره عا شباك الليل خرطشلو قصص عا ورق أبيض وضوّ الشجرة يرسم خيالات عالحيط وتصير الكلمات تشبه الأحلام والنطره تصير احلى والعيون ما تنعس يمكن تخاف تغفى قبل ما يوصل يا هالعيد ما بعرف ليش بتخلّي الدموع تكرج والقلب يضرب والشوق يزيد والذكريات تدق بقوّه عا الباب وإركض مش مصدّقه تا افتح وما لاقي حدا تطلع الريح بوجّي ترجّفني والثلج الأبيض عم ينزل ويعطيني الليل ورقة وقلم أَسود ويقلّي ما تزعلي عّم يسمعِك اكتبيلو متل ما كنتِ تكتبيلو عم يسمعك بس تصلّيلو ضلّي اندهيلو عّم يسمعِك ويطنّ الصدى من بعيد 'إيجو' هيدا انا يا بيّي عطول حكيني ما تخافي عم إسمَعِك.

#كتاب

2 views